Албит » Аш-су » Гали Акыш сеңелләре рецепты
26/01/2017

Гали Акыш сеңелләре рецепты

Апам Ләйлә ГАФФАРОВА әзерли.
 
186_sm_mar
Бу бәлешне миңа Әнкара университетының инглиз әдәбияты укытучысы, профессор Белгин Элбир өйрәтте. Ул безне – XIX гасыр романнары дәресләренә керүче магистрларны – шушы бәлеш белән сыйлый торган иде.

Кирәк:

* бер пачка маргарин;
* 200 г шикәр комы;
* лимон цедрасы;
* бер лимон суы;
* бер йомырка;
* он;
* бер пачка көпшәкләндергеч (разрыхлитель);
* ваниль;
* 6-8 алма;
* дарчин (корица).

Эш барышы:

Салмак утта эретелгән «Пышка» тибындагы маргаринга 200 г шикәр комы яки тарттырылган шикәр комы (монда ярты пачка майсыз эремчек тә өстәп җибәрергә мөмкин), бер чеметем тоз сибәбез һәм чәнечке белән болгата-болгата күпертәбез. Лимон цедрасы һәм лимон суы өстибез. Суынган катнашмага йомырка сытып болгатабыз. Катнашма өстенә ике стакан он салабыз, болгатып җибәргәнче, көпшәкләндергеч, бер чеметем ваниль салабыз һәм туглыйбыз. Он өсти-өсти туглый торгач – камыр йомшак пластилинга охшарга тиеш. Камырны ике өлешкә бүләбез (берсе зуррак булсын) һәм, ким дигәндә, ярты сәгатькә салкынга куябыз.  
Камыр «өлгергән» вакытта, эчлек әзерлибез. Алмаларны орлыкларыннан чистартабыз, телемләп турыйбыз.

Маргарин белән мул итеп майланган табага камырның зуррак өлешен салып, кул белән изә-изә кырыйларына кадәр күтәртеп җәябез. Алма өлешләрен тезәбез. Алманың баллы яки әчкелтем булуына карап, шикәр комы һәм мул итеп дарчин сибәбез (соңгысы мәҗбүри!). 
Камырның икенче өлешен җәеп, табадагы бәлешне каплыйбыз, кырыйларын чеметәбез. Камыр уалып торганлыктан, ертылып китсә дә зыян юк, җиңел генә «ябыштырып» куябыз.

Табаны уртача утта җылынган мичкә куябыз. Камыр бик нәфис, ул янмасын өчен аска сулы савыт куеп калдырабыз. 
40-45 минутта бәлеш әзер була! 

Әлеге рецепт шунысы белән яхшы, эчлеген абрикос, сливага алмаштырып була (бу очракта дарчин салынмый). Шулай ук камырга да лимон урынына әфлисун суы сыгарга мөмкин. 

Эремчек өстәргә теләгән хуҗабикәләргә шуны әйтим: андый камыр йомшаграк, бәлеше дә зуррак була. Ничек кенә булмасын, лимон суы һәм цедрасы яки әфлисун суы һәм цедрасын өстәмичә калмагыз – бар хикмәте шунда! 

Вак-төяк киңәшләр
Бәлеш калай табадан авырлык белән аерыла икән, табаны бер-ике кат юеш тастымалга төрегез яки пар өстендә тотып карагыз. 
Торт, пирожныйга салачак әстерхан чикләвеген мичтә җиңелчә генә кыздырып алыгыз, аңа урман чикләвеге тәме керәчәк.
Бәлешне суынгач кына кисегез. Кайнар килеш кисәргә туры килә икән, пычакны кайнар суга тыгып алыгыз. 
Бәлеш пешкәндә тиз кызарса, аны юеш кәгазь белән капларга киңәш ителә.
Бәлеш янмасын өчен мич почмагына сулы табак куеп калдырыгыз.

чыганак

Сәхифә: Аш-су

Әлегә фикерләр юк

Фикерегез

Эзләү


Язылу

Календарь

Октябрь 2017
Пн Вт Ср Чт Пт Сб Вс
« Сен    
 1
2345678
9101112131415
16171819202122
23242526272829
3031  

Рәсемнәр

1 5 pero4 balls_0 zavtrak ej11

Сандык