Татарстан журналистлары Анталияда

Бу көннәрдә Төркиянең Анталия шәһәрендә “ТRТ” Төркия телерадиокомпаниясе журналистлар өчен уку-укыту һәм гамәли семинар уздыра.

Әлеге семинарга 26 илдән төрек телен белүче 92 журналист чакырылды. Көнчыгыш Европа, Төньяк Африка, Азия, Урта диңгез төбәкләре арасында Татарстаннан килгән биш журналист та бар.

Семинарга җыелган журналистларны бирегә махсус килгән төрки дөнья шәһәрләре берләшмәсе рәисе, Дәнизли шәһәре мэры Нихат Зәйбәкчи дә сәламләде.
Өч атна дәвам итәчәк укуларда төрек теле, радио, телевидение, шәхси матбугат, заманча технологияләрне өйрәнү буенча мастер-класслар узачак. Дәресләрдә үз тәҗрибәләре белән Төркиянең танылган журналистлары, галимнәре уртаклашачак.